འུ་ཚོ་དངོས་གནས་དཔེ་ཀློག་ལ་སྤྲོ་སམ།འུ་ཚོས་སུ་ཞིག་གི་ཆེད་དུ་དཔེ་ཀློག་བྱེད་བཞིན་པ་རེད།དཔེ་ཀློག་གིས་རང་ཉིད་ལ་ཕན་ཐོག་གམ།དཔེ་ཀློག་ནི་དཔེ་ཆའི་དོན་དུ་བྱེད་དགོས་བ་འུ་རེད།ཡང་ན་གཞན་གྱི་མདུན་སར་ཅུང་བཟང་མདོག་བྱེད་སྐྱེད་ཞིག་འུ་རེད།དཔེ་ཀློག་ནི་ཆོས་ཀྱི་བརྫུ་བགས་དང་མཁས་པའི་བརྫུ་བགས་སྐོན་མཁན་ཞིག་འུ་རེད།དེ་ལྟར་རང་ཉིད་ལ་དྲི་བ་འགའ་བཏོན་རྗེས།དཔེ་ཀློག་དང་སློབ་སྦྱོང་རིག་གནས་ལ་དགའ་མདོག་ཁལ་དེ་ཡང་ཧ་ཅང་འཐུག་པའི་བརྫུ་བགས་ཞིག་དུ་མི་མཐོང་ངམ།དེ་ལྟར་རང་ཉིད་ཨུ་ཚུགས་ཀྱིས་བཙུར་བཙུར་བའི་མཐའ་མར།རང་ཉིད་ཀྱིས་རང་སྣང་གང་ཤར་གྱི་འདོད་པ་དག་དང་དུ་བླངས་ནས་རང་ཉིད་ལ་ཕྱི་གཙང་ནང་གཙང་གི་དཀར་འདོན་ཞིག་བྱེད་མི་འདོད་དམ།

བདེ་གཤེགས་སྙིང་པོ་སངས་རྒྱས་དངོས་ཡིན་པའི་རྒྱུ་མཚན་བསྟན་པ། གཉིས་པ་བདེ་གཤེགས་སྙིང་པོ་སངས་རྒྱས་དངོས་ཡིན་པའི་རྒྱུ་མཚན་བསྟན་པ་ནི། བདེ་གཤེགས་སྙིང་པོ་ཉིད་སངས་རྒྱས་ཆོས་ཀྱི་སྐུ་ཡིན་པར་གང་ལས་ཤེས་ཞེ་ན། དེ་ཉིད་ལ། སངས་རྒྱས་ཆོས་ཀྱི་སྐུའི་ཡོན་ཏན་མ་ལུས་པར་དབྱེར་མེད་དུ་བསྟན་པའི་ཕྱིར་ན་སངས་རྒྱས་ཆོས་ཀྱི་སྐུ་ཉིད་ཡིན་ཏེ། ཇི་སྐད་དུ་སངས་རྒྱས་ཕལ་པོ་ཆེའི་མདོར། སྟོང་གསུམ་དར་ ཡུག་ཆེན་པོའི་དཔེས་སེམས་ཅན་ཐམས་ཅད་ལ་དེ་བཞིན་གཤེགས་པའི་ཡེ་ཤེས་མ་ཚང་བ་མེད་པར་བཞུགས་པའི་ཚུལ་རྒྱ་ཆེར་བསྟན་པའི་རྗེས་སུ། སྟོང་གསུམ་ཚད་ཀྱི་རི་མོའི་གཞི་གཅིག་ཡོད་གྱུར་ལ། །རྡུལ་ཕྲན་མ་ལུས་ཀུན་ཀྱི་སྤུབས་ནའང་དེ་འདྲ་སྟེ། །སྐྱེས་བུ་མཁས་པ་མིག་ལྡན་ལ་ལས་རྣམ་ཕྱེ་ནས། །རི་མོའི་གཞི་དེས་འགྲོ་ཀུན་ཉེ་བར་འཚོ་བྱས་ན། །བཅོམ་ལྡན་དེ་ཡང་དེ་བཞིན་སེམས་ཅན་ཀུན་ཀྱི་སེམས། །རིལ་གྱིས་བདེ་གཤེགས་མཁྱེན་ཡིན་འདུ་ཤེས་བསྒྲིབས་གྱུར་ཞེས། །རྒྱལ་བའི་ཐུགས་རྗེ་བསྐྱེད་ཅིང་འདུ་ཤེས་སྤོང་བར་སྟོན། །འདུ་ཤེས་ཡོངས་སུ་ཤེས་ནས་རྒྱལ་སྲས་ཉེ་བར་འཚོ། །ཞེས་དང༌། རྒྱུད་བླ་མར། ཉེས་པ་གློ་བུར་དང་ལྡན་དང༌། །ཡོན་ཏན་རང་བཞིན་ཉིད་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། ། འགྱུར་བ་མེད་པའི་ཆོས་ཉིད་དོ། །ཞེས་བདེ་གཤེགས་སྙིང་པོ་སྔར་གློ་བུར་དྲི་མ་དང་བཅས་པའི་དུས་དང་ཕྱིས་དྲི་མ་དང་བྲལ་བར་གནས་གྱུར་པའི་དུས་ཀྱི་ཡོན་ཏན་ལ་ཁྱད་པར་ཅུང་ཟད་ཀྱང་མེད་པར་གསུངས་སོ། །འགྲིབ་པ་མེད་པ་དང་འཕེལ་བ་མེད་པ་ཉིད་བསྟན་པའི་མདོ་ལས་ཀྱང༌། ཤཱ་རིའི་བུ་དོན་དམ་པ་ཞེས་བྱ་བ་འདི་ནི་སེམས་ཅན་གྱི་ཁམས་ཀྱི་ཚིག་བླ་དྭགས་སོ། །ཤཱ་རིའི་བུ་སེམས་ཅན་གྱི་ཁམས་ཞེས་བྱ་བ་འདི་ནི་དེ་བཞིན་གཤེགས་པའི་སྙིང་པོའི་ཚིག་བླ་དྭགས་སོ། །ཤཱ་རིའི་བུ་དེ་བཞིན་གཤེགས་པའི་སྙིང་པོ་ཞེས་བྱ་བ་འདི་ནི་ཆོས་ཀྱི་སྐུའི་ཚིག་བླ་དྭགས་སོ། །ཞེས་དང༌། ཤཱ་རིའི་བུ་དེའི་ཕྱིར་ན་སེམས་ཅན་གྱི་ཁམས་གཞན་ལ་ཆོས་ཀྱི་སྐུ་ཡང་གཞན་པ་མ་ཡིན་ཏེ། སེམས་ཅན་གྱི་ཁམས་ཉིད་ཆོས་ཀྱི་སྐུ། ཆོས་ཀྱི་སྐུ་ཉིད་སེམས་ཅན་གྱི་ཁམས་ཏེ། འདི་ནི་དོན་གྱིས་གཉིས་སུ་མེད་དེ་ཡི་གེ་ཙམ་ཐ་དད་པ་ཡིན་ནོ། །ཞེས་དང༌། འཕགས་པ་དཔལ་ཕྲེང་གི་མདོར་ཡང༌། རྣམ་པར་དབྱེར་མེད་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གང་གཱའི་ཀླུང་གི་བྱེ་མ་ལས་འདས་པ་དང་ལྡན་པ་དེ་བཞིན་གཤེགས་པའི་ཆོས་ཀྱི་སྐུར་བསྟན་པ་སྟེ་བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་ སྐུ་འདི་ཉིད་ཉོན་མོངས་པའི་སྦུབས་ལས་མ་གྲོལ་བ་ནི་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་གསུངས་སོ། །མཁའ་འགྲོ་མ་རྡོ་རྗེ་གུར་དུ་ཡང༌། བདག་དང་གཞན་དུ་འཛིན་སྤངས་ཤིང༌། །རང་གིས་རིག་པའི་ཡེ་ཤེས་ཏེ། །དངོས་དང་དངོས་མེད་བདག་ཉིད་མཆོག།

མཁའ་མཉམ་སྟོང་པ་རྡུལ་དང་བྲལ། །འདོད་ཆགས་ཆགས་བྲལ་འདྲེས་པ་སྟེ། །ཐབས་དང་ཤེས་རབ་ཤིན་ཏུ་འདྲེས། །དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་མི་འགྱུར་དམ་པ་སྟེ། །དེ་ཉིད་ཀྱིས་ནི་ཐམས་ཅད་ཁྱབ། །དེ་འདིར་སངས་རྒྱས་ཡེ་ཤེས་ཏེ། །དཔལ་ལྡན་ཧེ་རུ་ཀ་ཞེས་བྱ། །ཞེས་ཏེ། སྲོག་ཆགས་རྣམས་ཀྱི་སྲོག་ཅེས་པ་དང༌། ཐམས་ཅད་ཁྱབ་ཅེས་པ་ནི། བདེ་གཤེགས་སྙིང་པོའི་དོན་ཡིན་ལ། དེ་ཉིད་སངས་རྒྱས་ཀུན་ཀྱི་ཡེ་ཤེས་དང་དཔལ་ཧེ་རུ་ཀར་གསུངས་པའི་ཕྱིར། བདེ་གཤེགས་སྙིང་པོ་ཉིད་སངས་རྒྱས་དངོས་ཡིན་པར་ཤེས་པར་བྱའོ། །

འགོས་ལོ་དེབ་སྔོན། འགོས་ལོ་གཞོན་ནུ་དཔལ་ནི། “བོད་ཀྱི་རབ་བྱུང་བདུན་པའི་ཆུ་སྤྲེལ། སྤྱི་ལོ 1392——རབ་བྱུང་བརྒྱད་པའི་ལྕགས་གླང་། སྤྱི་ལོ1481ལོའི་བར་དགུང་ལོ་དགུ་བཅུ་བཞུགས། འཁྲུངས་ཡུལ་ནི་ལྷོ་ཁ་འཕྱོངས་རྒྱས། པ་རའི་གྲོང་ནག་མེ་དགུ་ཟེར་བའི་ས་ཆར་འཁྲུངས། ཡབ་འགོས་སྟོན་འབྱུང་གནས་རྡོ་རྗེ་དང་། ཡུམ་སྲིད་ཐར་སྐྱིད་ཡིན། བླ་མ་དྲུག་ཅུ་ལྷག་ཙམ་བརྟེན་ནས་མདོ་སྔགས་ཆོས་ཚུལ་ཟབ་མོར་མངའ་བརྙེས་པར་གྱུར། བོད་ཡུལ་རང་ལ་བཞུགས་ཏེ་སྒྲ་རིག་པར་སྦྱངས་ནས་ལོ་ཙཱ་མཁས་པར་གྱུར། དེབ་ཐེར་སྔོན་པོ་འདི་ཉིད་དགུང་ལོ་གྱ་བཞི་པ་རབ་བྱུང་བརྒྱད་པའི་མེ་སྤྲེལ། སྤྱི་ལོ 1476 ལོའི་ལོ་འཇུག་ཏུ་མཇུག་རྫོགས་པར་མཛད། དེབ་ཐེར་འདིའི་པར་ཤིང་ཡངས་པ་ཅན་ལ་ཡོད་པ་དང་། ཞྭ་དམར་ཆོས་འགྲུབ་རྒྱ་མཚོས་གོར་དམག་བོད་ལ་ཁྲིད་པའི་རྐྱེན་གྱིས་ཡངས་པ་ཅན་དགོན་པ་དགེ་ལུགས་ལ་བསྒྱུར་ཞིང་། དེབ་ཐེར་འདིའི་པར་ཤིང་ཀུན་བདེ་གླིང་ལ་སྤོས་ཞེས་དུང་དཀར་བློ་བཟང་འཕྲིན་ལས་ཀྱི་འགོས་ལོའི་རྣམ་ཐར་མཛད་པ་དེའི་ནང་གསལ་བ་ལྟར་བསྡུས་ཏེ་བཀོད།