༄༅།།ཨ་ལགས་བླ་ཁོ་རྡོ་རྗེ་འཆང་༧རྗེ་འཇིགས་མེད་འཕྲིན་ལས་རྒྱ་མཚོའི་ཞལ་སྔ་ནས་ལུང་པ་སྐམ་པོའི་ནང་ཐུབ་བསྟན་རློན་པ་གནས་ཞེས་བདེན་ཚིག་པུཎྜ་རི་ཀའི་སིལ་མ་གཏོར་བ་ཆོས་ཀྱི་སྡེ་ཆེན་མོ་འདི་ཉིད་ལགས་སོ།།

ཀ་མགུར་ཀ་ལ་པིང་ཀའི་མགྲིན་དབྱངས་རི་ཚུལ་རྣལ་འབྱོར་དགྱེས་པའི་སྐྱིད་གླུ་ཞེས་བྱ་བ།

ཀ་ཡེ་དགོངས་ཤིག་འདིར་འདུས་རྡོ་རྗེ་ཡི་མཆེད་ལྕམ། །
ཁ་མང་ཁ་སྤུ་ཅན་གྱིས་ཚོགས་འཁོར་གྱི་ཉིན་མོ། །
ག་ལེར་མགྲིན་པའི་ཀློང་ནས་མགུར་མ་ཞིག་ལེན་འདོད། །
ང་རང་རི་ལ་དགའ་བའི་རང་གཅེས་ཞིག་ཡིན་སྐད། །

ཅ་ཅོས་འདི་ལོང་བྲལ་བའི་མཚོ་སྙིང་གི་དབེན་པར། །
ཆ་ལུགས་མ་བཅོས་བྱུང་རྒྱལ་རྣལ་འབྱོར་བའི་ཁྱུ་གཅིག །
ཇ་ཆང་གང་བྱུང་འཚོ་རྟེན་ངན་ངོན་ཙམ་བརྟེན་ནས། །
ཉམས་རྟོགས་ཉི་མ་ཤར་བའི་རི་བཞུགས་དག་སྐྱིད་པོ། །

པ་ཀོར་བཻ་རོ་ཞབས་དཀར་གུ་རུ་ཡི་སྒྲུབ་གནས། །
ཕ་གཅིག་བླ་མའི་མན་ངག་ཐུགས་དམ་དུ་འཆིང་བའི། །
བ་ཡན་རྣ་མེད་རྟ་ཡན་མཐུར་མེད་ཀྱི་དཔེར་བཞིན། །
མ་ལུས་འགྲོ་བའི་མགོན་གཅིག་རི་བཞུགས་དག་སྐྱིད་པོ། །

ཙ་གངས་མཚོ་གླིང་དབེན་པ་མི་མེད་ཀྱི་རི་ཁྲོད། །
ཚྭ་མེད་རྡོལ་མེད་བཟའ་བཏུང་ཆོག་ཤེས་ལ་བརྟེན་ནས། །
ཛ་ཡ་རིག་འཛིན་གཤེགས་ཤུལ་གྲུབ་མཉེས་ཀྱི་གདན་སར། །
ཝ་ལེར་སྒྲུབ་ལ་གཞོལ་བའི་རི་བཞུགས་དག་སྐྱིད་པོ། །

ཞྭ་གོས་ཡོ་བྱད་འཚོ་བ་ངན་ངོན་ཙམ་བརྟེན་ནས། །
ཟ་ཉལ་ཀུན་ཏུ་བླ་མའི་མན་ངག་དེ་སྒོམ་ན། །
འ་ཅག་བྱ་བཏང་འདི་བདེ་ཕྱི་སྐྱིད་ཞིག་མིན་ནམ། །
ཡ་ཀི་རྣམ་ཐར་སྐྱོང་བའི་རི་བཞུགས་དག་སྐྱིད་པོ། །

རྭ་བ་གངས་ཅན་མདོ་དབུས་ཁམས་གསུམ་གྱི་ཡུལ་གྲུ། །
ལ་ལུང་དབེན་གནས་གང་གི་གང་བཟང་ལ་འདུག་འགྲོ། །
ཤ་རྒྱའི་སྦུབ་ནས་འོད་གསལ་གསང་ལམ་དང་མཇལ་ན། །
ས་ལམ་མྱུར་དུ་གྲོལ་པའི་རི་བཞུགས་དག་སྐྱིད་པོ། །

ཧ་ཧ་མ་ཧཱ་དཱེ་ཝ་མཚོ་གླིང་གི་རི་ནས། །
ཨ་མ་སྟོང་ཆེན་བུ་མོའི་ཞལ་ངོ་ཙམ་མཇལ་བའི། །
ཨ་བུ་སྨྱོན་པའི་སྐྱིད་གླུ་ཆོས་མཆེད་རྣམས་ཕུལ་ལོ། །
ཧ་ཅང་དགའ་འོ་སྐྱིད་དོ་ཚོགས་འཁོར་ལ་རོལ་ཤོག །

ཅེས་རབ་གནས་ལྕགས་གླང་ཟླ་དགུ་བ་དང་པོའི་ཚེས་ཉེར་ལྔ་ཚོགས་འཁོར་ཉིན་བླ་མ་ཚེ་མཚམས་པ་ཐུབ་བསྟན་དར་རྒྱས།འབའ་ཤིང་ཁྲི་དགོན་པའི་བྱ་བྲལ་ངག་བཅད་པ་གསང་སྔགས་བསྟན་འཛིན། སྡེ་དགེ་བྱ་བྲལ་བ་སྔགས་འཆང་ལོང་རྟོགས་ཉི་མ། བཙུན་མ་དཀོན་མཆོག་ལྷ་མོ། མཁའ་འགྲོ་བྱ་བྲལ་མ་ཀུན་བཟང་དབང་མོ། སྔགས་མ་མཁའ་སྤྱོད་དབང་མོ་སོགས་རྡོ་རྗེའི་སྤུན་སྲིང་རྣམས་སྤྲོ་བ་སྐྱེ་ཕྱིར་དུ་ཀུན་ཏུ་རྒྱུ་བའི་སྤྲང་སྨྱོན་ཨོ་རྒྱན་བསམ་འགྲུབ་ཀྱིས་ཀ་མགུར་ཀ་ལ་པིང་ཀའི་མགྲིན་དབྱངས་རི་ཚུལ་རྣལ་འབྱོར་དགྱེས་པའི་སྐྱིད་གླུ་འདི་ཡིད་ལ་གང་ཤར་དུ་བླངས་སོ། དགེ་ལེགས་འཕེལ།#莲师[超话]# https://t.cn/R2WxDfa

བློ་བཟང་མཁྱེན་བརྩེའི་དཀྱིལ་འཁོར་རབ་རྫོགས་པའི།།
འཇིགས་མེད་མཆོག་བརྙེས་ཐུབ་བསྟན་མཁར་འཕགས་ཏེ།།
བཤད་སྒྲུབ་ཆོས་ཀྱི་འོད་སྣང་འབུམ་འགྱེད་པ།།
མཚུངས་བྲལ་སྨྲ་བའི་ཉི་མར་གསོལ་བ་འདེབས།།