གང་དུ་བོད་ཀྱི་སྐད་ཡིག་དང་།།
བོད་ཀྱི་རིགས་རུས་མ་བརྫད་པར།།
བོད་ཀྱི་གོམས་སྲོལ་རྒྱུན་བཟུང་སྟེ།།
གཙང་ཞིང་གཙང་མར་གནས་པ་དེར།།
རྒྱ་དང་ཁ་ཆེའི་བསླད་སྐྱོན་གྱིས།།
གོས་པ་མེད་པར་སྲིད་པ་འདི།།
ཇི་སྲིད་གནས་པ་དེ་སྲིད་དུ།།
རང་རིགས་གདོང་དམར་བོད་ཕྲུག་དག།
ལྷམ་མེ་ལྷན་ནེ་ལྷང་ངེར་ཤོག།

ཡབ་མེས་ཀྱི་ཕ་མཁར།

མཛེས་སྡུག་ལྡན་པའི་རི་བོ་གྲུ་འཛིན་ལ།
ཁྱེད་ནི་ཡུལ་དབུས་ཀྱི་ཕོ་བྲང་དམར་པོ་ཞེས་པའི་ཆེས་བླ་ན་མཐོ་བ་དེ་ཡིན་ལ། ཁྱེད་ནི་ང་ཚོའི་མེས་དབོན་གྱིས་བཞག་པའི་ཕ་མཁར་དེ་ཡང་ཡིན། ཕོ་བྲང་ལ་པོ་ཏ་ལ། ཁྱེད་ནི་གནོད་ཤུགས་གང་ཡང་མ་ཐེག་པའི་བོད་ཀྱི་ཕོ་བྲང་ནང་ནས་ཆེས་བརྗིད་ཉམས་ལྡན་པ་དེ་ཡིན་ལ། ཁྱེད་ནི་མེས་རྒྱལ་གྱིས་བཞག་པའི་གདོང་དམར་བའི་བླ་སྲོག་གི་ཕ་མཁར་དེ་ཡང་ཡིན།
ཇོ་བོ་ལ་ཡིད་བཞིན་ནོར་བུ། ཁྱེད་ནི་ང་ཚོའི་ནང་བསྟན་གྱི་བརྒྱུད་པའི་སྐུ་མཆོག་དེ་ཡིན་ལ། ཁྱེད་ལ་གང་གིས་གུས་ན་དེ་ལ་བྱིན་རླབས་སྩོལ་བས་ལྷ་མཆོག་དེ་ཡང་ཡིན་ནོ། །

ཐོབ་ཤོར་རེ་དོགས་ཀྱི་འགྲན་རྩོད་འདི་ཡིས།།
རང་སེམས་ཞི་དུལ་གྱི་ལྷིངས་འཇག་དཀྲོག་ཐལ།།
ཕྱིན་ཆད་བདེན་དྲང་གི་གུ་ཡངས་ངང་ནས།།
རང་སེམས་འདུལ་སྦྱོང་གི་ལས་ཤིག་མེད་ན།།
ཆོས་གཟུགས་འདི་ཀོ་ལ་སྙིང་པོ་འདུག་གམ།།

གུ་རུ་ཉི་མས། 2023 11 12