སྙན་ངག་མེ་ལོང་མའི་དཔེར་བརྗོད།
ཐེ་ཚོམ་ཕུལ་བྱུང་།
ཁྱོད་ཀྱི་མཚར་སྡུག་ལུས་ལ་མ་བཞད་པའི།།
མཛེས་པའི་ཡོན་ཏན་སྲིད་དང་ཞི་བའི་ཁམས།།
གང་དུ་ཉུལ་ཡང་ཡོད་དང་མེད་པ་ཡི།།
ཐེ་ཚོམ་རླབས་ཕྲེང་དྲག་པོ་རབ་ཏུ་འཕྱུར།།

ངེས་པའི་ཕུལ་བྱུང་།
སྨན་ཆུང་ཡིད་འཕྲོག་ཁྱོད་ནི་ད་དུང་ཡང་།།
སོ་སོའི་སྐྱེ་བོའི་གནས་ལས་མ་མཐར་ཕྱིར།།
ཁྱེད་ལ་མེད་པའི་ལང་ཚོའི་དཔལ་འགའ་ཞིག།
ད་དུང་ཡོད་པར་བདག་ལ་ཐེ་མི་ཚོམ།།

࿐རིག་མྱུག་གིས།

࿐ དེ་ནས་བོད་ཡུལ་མུན་པའི་གླིང་།

ཐུབ་བསྟན་ཉི་མས་ཉིན་བྱེད་ལ།

ནག་པོ་ལྷ་འདྲེས་མུན་པར་བསྒྲུབས།

དེ་ཚེ་སློབ་དཔོན་པདྨ་ཡིས།

ཁྱོད་སྦྲན་ལྷ་འདྲེ་བཀར་བཏགས་པས།

ཆོས་ཀྱི་རྒྱལ་པོའི་བཞེད་པ་འགྲུབ།

དེ་བཞིན་དགེ་བའི་ལས་བརྩམས་པར།

གཞན་གྱིས་འཚེ་བ་ཐམས་ཅད་ཟློག།།

࿐སྔོན་ཐོན་གང་ལ་ཟེར།

འགྲོ་བ་མིའི་རིགས་ཞིག་ཡིན་ནས་བཟུང་རྒས་མི་འདོད་པ་དང་ན་མི་འདོད་པ། ལྟོ་གོས་གནས་མལ་གཉེར་བ། མཚན་སྙན་ཁེ་ཕན་ཐོབ་འདོད་སོགས་རེ་དོགས་མང་པོ་ཞིག་ལྷན་སྐྱེས་རང་ཆས་སུ་ཡོད། དེ་ལས་མི་ལ་ལ་ནི་ཆོས་རིག་དང་ལ་རྒྱལ་ལ་ཞེན། ལ་ལ་ནི་ལྟོ་གོས་ལོང་སྤྱོད་ལ་ཞེན། ལ་ལ་ནི་རང་བཞིན་གྱིས་ལྷོད་གཡེང་སོས་དལ་ཅན་ཞིག་ཡིན། འཛམ་གླིང་ནི་འདུ་ཤེས་སྣ་ཚོགས་སྤྲིན་ལྟར་གཡོ་བའི་ཁོར་ཡུག་ཆེན་པོ་ཅི་ལ་མིན།

འོན་ཀྱང་ཞིབ་ཏུ་བསམ་གཞིགས་ཤིག་གཏོང་ན། བདེན་དྲང་དང་གནས་ལུགས། དམངས་གཙོ་དང་འདྲ་མཉམ། བདེ་སྐྱིད་དང་བྱམས་བརྩེ་ལྡན་པའི་སྤྱི་ཚོགས་ཞིག་ནི་ཕན་ཚུན་བལྟོས་འཇོག་ཙམ་ལས་མཛེས་སྡུག་ལྡན་པའི་སྤྱི་ཚོགས་ཕུན་སུམ་ཚོགས་པ་ཞིག་སུས་ཀྱང་མཐོང་དཀའ། བོད་ནི་འཛམ་གླིང་ཐོག་མཐའ་མའི་ཞིང་ཁམས་ཞེས་ཀུན་གྱིས་འབོད་བཞིན་ཡོད། དོན་དངོས་བོད་ཡུལ་ལུང་པ་ལ་ཁྱད་ཆོས་གང་ཞིག་ཡོད་ཅེ་ན། དེ་ནི་ཞི་བསིལ་ལྷིང་ཆགས་པའི་རི་མཐོ་ཆུ་གཙང་གི་ཁོར་ཡུག་ནང་དུ་མི་རྣམས་ཆོས་དད་བླ་ལྷག་ལྡན་སའི་ལུང་པ་ཞིག་ཡིན། དེས་ན་བོད་མིའི་དེང་རབས་འཛམ་གླིང་གི་རྗེས་ཟིན་དགོས་སམ་མི་དགོས། འཛམ་གླིང་སྔོན་ཐོན་སྤྱི་ཚོགས་ལ་སློབ་དགོས་སམ་མི་དགོས། སྔོན་ཐོན་ཟེར་བ་དེ་ཅི་ཞིག་ལ་ངོས་འཛིན། བོད་རང་ལ་སྔོན་ཐོན་ཅི་ཞིག་ཡོད། སྤྱིའི་ཆ་ནས་སྔོན་ཐོན་ཡིན་མིན་དེ་གཙོ་བོ་དཔལ་འབྱོར་དང་ཚན་རིག་ཐད་ནས་བཤད་སུ་ཡོད་པ་འདྲ། བོད་དཔལ་འབྱོར་འཕེལ་རྒྱས་གཙོ་བོ་ཡིན་དང་ཆོས་རིག་གཙོ་བོ་ཡིན། དཔེར་ན། ང་ཚོའི་སྔོན་རྒྱ་གར་ནང་ཆོས་ལ་སློབ་པ་བཞིན་དུ་དེང་རབས་དབྱིན་ཇིའི་རིག་གཞུང་ལའང་སློབ་ན་བོད་མིའི་གནའ་སྲོལ་གོམས་གཤིས་དང་མིའི་བསམ་བློ་ཆོས་རིག་བཅས་ལ་གདོང་ཐུག་ཨེ་འགྲོ དེང་སང་ཆོས་དད་ཀྱི་ནང་ནས་ལྟ་ལོག་མཁན་ཇེ་མང་སོང་ཡོད་པ་འདི་རྒྱུ་རྐྱེན་གང་དང་ས་ཆ་གང་ནས་བྱུང་ཡོད། ཉེ་བའི་ལོ་འགའ་ཡི་སྔོན་གསར་བུ་རེ་གཉིས་ཀྱིས་དམངས་གཙོ་དང་འདྲ་མཉམ་གྱི་སྐད་ཆ་བཤད་རེད། དེའང་དབྱིན་ཇིའི་བསམ་བློ་རེད། དེང་སོང་སྐད་ཆ་དེ་ཇེ་ཉུང་སོང་འདུག་བསམ། སྤྱི་དམངས་གཙོ་དགོས་ཀྱང་དམངས་གཙོའི་ལམ་ལུགས་སྤེལ་སའི་མང་ཚོགས་ཁྲོད་ཏུ་ཤེས་ཡོན་དཔལ་འབྱོར་ལྷག་བསམ་གྱི་ཆ་རྐྱེན་ལྡན་མིན་དང་། གྲལ་རིམ་དབེན་པའི་དམངས་གཙོ་བཤད་ན་ཆགས་སྡང་ལས་ཅི་ཡོད། སྤྱི་སྔོན་ཐོན་མི་ཡི་འཚོ་གནས་དང་ཤེས་བྱ་བདེ་ཐང་སོགས་དགག་བྱའི་གནས་མིན། བོད་ན་ཡོད་པ་ཆོས། བོད་མི་ཡོངས་རྫོགས་ཆོས་ལ་དད། དེས་ན་ཆོས་ལུགས་འཛིན་སྐྱོང་བྱེད་རྒྱུ་གལ་ཆེ་ལ། ནང་ཆོས་ནི་དུས་རབས་གང་དང་མི་རིགས་གང་ཞིག་གི་ཁམས་དབང་མོས་པ་དང་མཐུན་པའི་སྔོན་ཐོན་གྱི་ཆོས་རིག་ཕུན་སུམ་ཚོགས་པ་ཞིག་ཡིན། དེ་ཡིན་པར་ཁ་བཤད་ཙམ་མ་ཡིན་པ་འཛམ་གླིང་གནའ་དེང་ཤར་ནུབ་མཁས་པའི་མགྲིན་གཅིག་ཏུ་བསྔགས་བཞིན་ཡོད། ཉེ་བའི་ལོ་ཉིས་བརྒྱའི་ནང་དུ་འཛམ་གླིང་ཡོངས་ལ་དབྱིན་ཇིའི་དེང་རབས་རིགས་གནས་ཀྱི་ཤན་ཤུགས་ཆེ་པོ་ཐེབ་ཡོད་རེད། གལ་སྲིད་རིག་གནས་གསར་པས་ཤན་ཤུགས་དང་བཙན་འཛུལ་ཐེབ་ན་མི་རིགས་དེའི་གདོད་མའི་རིག་གཞུང་དང་གདོང་ཐུག་ཅི་རིགས་ཐེབ་ངེས། རང་རེ་ཁྱིམ་མཚེས་རྒྱལ་ཁབ་འབྲུག་ནས་སྲོལ་རྒྱུན་རིག་གཞུང་སྲུང་སྐྱོབ་ཀྱི་ཆེད་དུ་འཛམ་གླིང་རྒྱལ་ཁབ་བཅུ་ལྷག་ཙམ་མ་བཏོགས་ཕྱི་འབྲེལ་གྱི་འབྲེལ་ལམ་བཞག་མེད། འབྲུག་ཕྱིའི་རྣམ་པ་རྗེས་ལུགས་སུ་ཆགས་ཡོད་རུང་། ནང་གི་རིག་གཞུང་ཁོར་ཡུག་དང་བདེ་སྐྱིད་ཚོན་གྲངས་ཐད་འཛམ་གླིང་ཡུལ་སྐོར་པ་མང་པོའི་ཡིད་འགུལ་སའི་གནས་སུ་ངོས་འཛིན་བཞིན་ཡོད། བོད་ཀྱང་གཙོ་བོ་སྲོལ་རྒྱུན་ཆོས་རིག་གོམས་གཤིས་འཐུག་སའི་མི་རིགས་ཞིག་ཡིན་ཕྱིར་འབྲུག་པའི་ལམ་ལུགས་ལ་འགྲོ་ཆོག་སྙམ། མདོར་ན། སྔོན་ཐོན་གྱི་ཐ་སྙད་ལ་ཞེན་ནས་གཞན་རིག་ལ་འགྲམ་ཆུ་མི་ཁོལ་བ་རང་གི་རིག་གཞུང་རྩིས་སུ་འཛིན་རྒྱུ་ནི་ཆེས་འོས་ཤིང་འཐད་པའི་གནས་ལུགས་མཐའ་ཐུག་ཞིག་མིན་ནམ་སྙམ།

ཡིད་མཐུན་ཆོས་ཀྱི་གྲོགས་པོ་ཡ་དིང་མཁན་རིན་པོ་ཆེ་ཆོས་སྐྱབས་ལགས་ཀྱིས་གེ་སར་སློབ་གྲྭ་ལ་གནང་བའི་བཀའ་སློབ་དུམ་གཅིག་ཐོས་པའི་རྐྱེན་ལས་ཀུན་བཟང་བསྟན་འཛིན་ནས་རྨོངས་འཆར་སྣ་ཚོགས་ཡི་གེའི་གཟུགས་སུ་བཀོད་ནས་ཕུལ་བའོ།།

༢༠༢༤.༡.༤