༼ཨེ་ཤར་ས་ཡི་ཐིག་ལེར་སྤྱོད་པ་ལ་རྒྱུ་བའི་གཏམ༽ཞེས་བྱ་བ་འདི་ནི། བོད་ཀྱི་ལོ་རྒྱུས་ཞིབ་འཇུག་གི་དཔྱད་གཞིར་ངེས་པར་ལེན་འོས་ནའང་། གུས་པས་བླུ་ཡོན་ལ་མི་དམངས་དངུལ་ལོར་ལྔ་སྟོང་སྤྲད་པ་ཡིན། བོད་ཀྱི་ཀློག་མཁན་དབུལ་པོ་རྣམས་ཀྱིས་ཅུང་དཀའ་ཡང་སྲིད། གཅིག་བྱས་ན། ཉིད་ལ་གོ་སྐབས་རེག་ནས། དཔེ་རྙིང་ཐང་ཁྲོམ་དུ་འགྲེམ་པ་སོགས་ལས་སྒོར་ཟུར་འགའ་རེ་བྱས་ནས་རེག་ཀྱང་སྲིད་པས། ཅིས་ཀྱང་ཐུགས་ཉམས་ཞོགས་དང་། — བན་ཤུལ་པས།

༼རྨོངས་བའི་སེམས༽
སྔོན་དུ་རྒྱུག་ན་ཧམ་པ་ཆེ་རབས་ཟེར།།
བར་དུ་བསྡད་ན་གཡོ་སྒྱུ་ཆེ་རབས་གླེང་།།
ཐ་མར་སོང་ན་རྗེས་ལུས་ཡིན་རབས་བཤད།།
དུག་དང་འདྲ་བའི་མི་ཁ་ཐལ་ཡིས་ཆོད།།

གཞན་ལས་མཐོ་ན་ཕྲག་དོག་མདའ་བཞིན་འཕེན།།
དེ་ལས་དམའ་ན་མཐོང་ཆུང་ཆར་ལྟར་འབབ།།
དབུས་ན་གནས་ཀྱང་ཡ་མཚན་མིན་མདོག་འདོད།།
བདུད་ཀྱིས་བསླུས་བའི་སེམས་དེ་རྡུལ་དུ་རློགས།།

ཐུ་བ་ལ་ཡང་ཁ་སྨྲས་གཏོང་མཁན་མང་།།
རྗེ་བཙུན་ལ་ཡང་ཕྲག་དོག་བྱེད་མཁན་ཡོད།།
རང་ཅག་ཐ་མལ་རྣམས་ལ་སྨྲས་མ་དགོས།།
གཙོ་བོ་རང་གིས་རང་ཉིད་མ་བསླུ་གཅེས།།

ལོ་རྒྱུས་ཀྱི་འགྲེལ་ཚུལ་གསར་བ་སྟེ། ༼ཁྲི་དར་མ་འུ་དུམ་བཙན་པོ་དང་འབྲེལ་བའི་གསུང་རྩོམ་གཉིས་ཀྱི་བརྗེད་ཐོ༽ བན་ཤུལ་དཔལ་མཁར་རྒྱལ་གྱིས། ཀུན་གྱིས་ལུང་རིགས་ཀྱི་དགག་སྒྲུབ་བྱེད་པར་རིགས།