#微博[超话]# ࿐སླར་ཡང་དགོང་དྲོའི་ཆ་ནས་སྐྱེ་འགྲོ་ཀུན་ལ་ལོ་གསར་བཟང་བའི་འཚམས་འདྲི་དང་བཅས། རང་ཉིད་དགའ་བདེའི་དཔལ་ལ་རོལ་བའི་སྐབས་དེ་ན་འཛམ་གླིང་ས་ཕྱོགས་གང་སར་འགྲོ་བ་མང་པོ་དམག་འཁྲུགས་དང་ནད་ཡམས་བཀྲེས་ལྟོགས་སོགས་དཀའ་སྡུག་སྣ་ཚོགས་མྱོང་བཞིན་ཡོད་པ་དེ་དག་གང་མགྱོགས་སྡུག་བསྔལ་ལས་གྲོལ་ཏེ་བདེ་སྐྱིད་དང་ལྡན་པ་ཞིག་ཡོང་རྒྱུར་སྨོན་ལམ་གང་མང་ཡོད་པ་ཞུ་རྒྱུ་ཡིན།

༄༅།། ཕྱག་ཆེན་ཡེ་ཤེས་གསལ་བྱེད།

བླ་མ་གྲུབ་ཐོབ་རྣམས་ལ་ཕྱག་འཚལ་ལོ། །

གཞི་ཕྱག་རྒྱ་ཆེན་པོ། །ལམ་ཕྱག་རྒྱ་ཆེན་པོ། འབྲས་བུ་ཕྱག་རྒྱ་ཆེན་པོའོ། །
࿐དང་པོ་དངོས་པོ་གཤིས་ཀྱི་གནས་ལུགས། སངས་རྒྱས་ཀྱི་དགོངས་པ། སེམས་ཅན་གྱི་སེམས་ཉིད། ཁ་དོག་དང་དབྱིབས་སུ་མ་གྲུབ་པ། མཐའ་དང་དབུས་སུ་མ་གྲུབ། རྒྱ་ཆད་ཕྱོགས་ལྷུང་དང་བྲལ་བ། ཡོད་མ་མྱོང་། །མེད་མ་མྱོང་། མ་འཁྲུལ། མ་གྲོལ། རྒྱུས་མ་བསྐྱེད། རྐྱེན་གྱི་མ་བསྒྱུར། སངས་རྒྱས་མཁས་ཏེ་མ་བཅོས། སེམས་ཅན་བླུན་ཏེ་མ་བསླད། རྟོགས་པས་བཟང་དུ་མ་སོང་། འཁྲུལ་པས་ངན་དུ་མ་སོང་། དེ་ནི་གཞི་ཀུན་ལ་གནས་པས་གཞི་ཕྱག་རྒྱ་ཆེན་པོའོ། །
࿐ལམ་ཕྱག་རྒྱ་ཆེན་པོ་ནི། གཞི་དེའི་སྟེང་དུ་ཉམས་སུ་བླངས་པའི་ཆོས་འཇོག་དུས་དམིགས་མེད་དུ་འཇོག །གནས་ན་ཡེངས་མེད་དུ་གནས། ཁྱེར་དུས་འཛིན་མེད་དུ་ཁྱེར། འཆར་ན་ཆོས་ཉིད་དུ་འཆར། གྲོལ་དུས་རང་གྲོལ་དུ་འགྲོ་བ་གཅིག་ཉམས་སུ་ལེན་པའོ། །དེ་ནི་ལམ་ཕྱག་རྒྱ་ཆེན་པོའོ། །
࿐འབྲས་བུ་ཕྱག་རྒྱ་ཆེན་པོ་ནི། །གྲོལ་བྱ་གྲོལ་བྱེད་དང་བྲལ་བ། །རེ་དོགས་དང་བྲལ་བ། བློ་ཟད་ཆོས་ཟད་འཛིན་མེད་ཞེས་པ་བློ་ལས་འདས་པས་བརྗོད་པ་དང་བྲལ་བའོ། །དེ་ནི་འབྲས་བུ་ཕྱག་རྒྱ་ཆེན་པོའོ། །འདིར་གཞི་ལམ་འབྲས་གསུམ་དབྱེར་མེད་དུ་ཉམས་སུ་ལེན་པའོ། །ཕྱག་རྒྱ་ཆེན་པོ་ཡེ་ཤེས་གསལ་བྱེད་ཀྱི་གདམས་པ། རྗེ་བཙུན་མི་ལ་རྣལ་འབྱོར་གྱིས་མཛད་པའོ།། །།

࿐གུང་ཐང་བསྟན་པའི་སྒྲོན་མེས།
གཙོ་བོ་ལས་འབྲས་དཀོན་མཆོག་ལ།།
བློ་ཕུགས་གཏད་ན་ཅི་བསམ་འགྲུབ།།
ལྷ་ཡི་རྒྱལ་པོས་ཆར་ཕབ་ན།།
ལོ་ཏོག་ཕུན་སུམ་ཚོགས་པར་འགྱུར།། ​​​ https://t.cn/R2Wxekq